ქართული პოლიტიკით დაინტერესებული მკითხველი აუცილებლად შეამჩნევს იმ პარადოქსალურ სიტუაციას, რომელიც სუფევს ქართულ პოლიტიკოსებში სტუდენტური და საერთოდ ახალგაზრდული პოლიტიკის მიმართ. პოლიტიკოსების დიდი ნაწილი ვერ ახერხებს გამონახოს საერთოდ ენა ახალგაზრდებთან, შედეგად , სტუდენტებს აცხადებენ ხოლმე სააკაშვილის რეჟიმის მხარდამჭერებად და გულისტკივილით აღნიშნავენ უცხოელი სტუდენტების წამყვან როლს საპროტესტო მოძრაობებში.

ბუნებრივია, როდესაც ხედავ რომ ხელისუფლებასა და ოპოზიციას შორის არსებითად სხვაობა მხოლოდ ის არის რომ “მიშა უბრალოდ ცუდი ტიპია” და მისი ოპონენტები კიდევ კარგები და და კეთილები არიან და ეს არის უმთავრესი განსხვავება, წარმოუდგენელია ასეთი პოლიტიკის მიმართ არ ჩამოგიყალიბდეს ნეგატიური დამოკიდებულება.
ბოლო პერიოდში, მიუხედავად არნახული და ევროპაში და მსოფლიოში სრულიად წარმოუდგენელი ეკონომიკური აღმავლობის ტემპების მიუხედავად ეს არანაირად არ აისახება, სტუდენტების და მათი ოჯახების ცხოვრებაზე. ბევრი სტუდენტისთვის ცხადი რეალობაა, როდესაც ვეღარ ახერხებენ სწავლის არაადეკვატური გადასახადის გადახდას და განათლების გარეშე რჩებიან, ასევე სათუოა განათლების მიღების შემთხვევაში დასაქმების პერსპექტივებიც . ქვეყნის ეკონომიკური განვითარების დინამიკა ფაქტიურად ადგილს არ ტოვებს სტუდენტებისთვის, გამომდინარე იქიდან რომ ეკონომიკური პოლიტიკა მიმართულია დაბალკვალიფიცირებული მშრომელების არსებობაზე, რომლებმაც საკუთარი სიიაფით და მშრომელებისადმი ნებისმიერი მოპყრობის უფლებით(ლიბერალური შრომის კოდექსი) უნდა მოიზიდონ უცხოელი ინვესტორები.(აქვე შეიძლება აღინიშნოს რომ მიუხედავად იმისა რომ, დამქირავებელს ვგონებ მოკვლის გარდა ნებისმიერი რამის უფლება აქვს, რატომღაც არ ჩანს უცხოელი ინვესტორების მიერ ატალახებული საქართველოს საზღვრები)

ყველაფერ ამაში გასაკვირი მხოლოდ ის შეიძლება იყოს რომ ეს პროცესები საქართველოში მხოლოდ ახლაღა დაიწყო, მაგრამ როგორც ამბობენ სჯობს გვიან ვიდრე არასდროს. გლობალურ ნეოლიბერალურ წესრიგს უკვე დიდი ხანია წყალი შეუდგა და ამ ტენდენციებმაც საქართველოშიც ჩამოაღწია, სამწუხაროდ ჯერჯერობით ეს მხოლოდ საზოგადოების ყველაზე პროგრესულ ნაწილში, სტუდენტობაში გამოიხატება.